| Meles oo qaabilay Kaaliyaha Xoghayaha Arrimaha Dibadda ee Maraykanka u qaabilsan Arrimaha Afrika |
Addis Ababa, 23-Jul-2010 - Ra'isulwasaaraha dalka Itoobiya, Meles Zenawi, ayaa qaabilay Kaaliyaha Xoghayaha Arrimaha Dibadda ee dalka Maraykanka u qaabilsan Arrimaha qaaradda Afrika, Johnnie Carson, oo booqasho shaqo ku maraya dalkan Itoobiya.
Meles iyo Johnnie ayaa ka wada-hadlay xidhiidhka sii xoogeysanaya ee dalalka Mareykanka iyo Itoobiya, iyo arrimaha xasaasiga ah ee ka taagan guud ahaan gobolka.
Labada dhinac ayaa ka dooday xaaladda cakiran ee dalka ay dagaalladu aafeeyeen ee Soomaaliya, iyo doorka ay bulshada caalamku ka cayaari karto sidii loo xoojin lahaa dowladda KMG ah iyo ciidanka nabad illaalinta ee AMISON.
Waxaa kale oo ay labada dhinac isla gorfeeyeen sidii sare loogu qaadi lahaa dadaalka lagu xaqiijinayo geedi socodka nabadda ee dalka Sudan.
Johnnie ayaa ku nuuxnuuxsaday inay Itoobiya ka faa'iideysaneyso barnaamijyada gargaarka aadanimo, damaanadda cuntada, caafimaadka iyo isbadalka cimilada.
Sida uu sheegay Johnnie, weerarkii argagixiso ee ay kooxda al-Shabaab dhawaan ku qaaday magaallada Kampala ee dalka Uganda ayaa muujiyey inay kooxdan qatar ku tahay gobolka, isagoo intaa raaciyey, inay tahay in la xoojiyo dowladda KMG ah ee Soomaaliya, si ay uga hortagto falalka noocan oo kale ah ee qarbudaada ah.
wabishabeele.com |
|
