| Cabdi: Madaxweyne kasta oo iga horeeyey wuxuu ku fiicnaa baan uga dayaneynaa |
Jigjiga, 18-Jul-2010 - Madaxweynaha dowlad deegaanka Soomaalida, mudane Cabdi Maxamud Cumar, oo la hadlayey Laanta Af-Soomaaliga ee BBC, ayaa sheegay in madaxweynayaashii isaga ka horeeyey uu mid kastaa kaga dayan doono inta fiican, iska illaalin doono intooda xun.
"Nasiib waxaan u helay inaan kaga faa'ideyso dhinacoodii...kii nabadgalyada ku fiicnaa nabadgalyada ayaanu kaga dayaneynaa, kii horumar ku fiicnaa horumarka ayaanu kaga dayaneynaa, kii shacabka inuu soo jiito ku fiicnaa taas baan kaga dayaneynaa, kii shacabka aan u rooneyn waanu iska illaalineynaa," ayuu yiri Cabdi.
Shacabka deegaanka Soomaalida ayaa labadi sano ee la soo dhaafay aanan helin hogaamin suuban, taasoo ay sabab u aheyd masuuliyiinti ugu sarsareysay ee xiligaas oo dantooda qaaska ah ka hormarisay tii umadda. Masuuliyiintan ayaanan wax xidhiidh ah la laheyn noocyada bulshada, markii laga reebo koox yar oo daneysato ah, kuwaasoo ka horgeeyey umadda inteedi kale.
Dhanka kale, Cabdi wuxuu tilmaamay muhiimadda nabadgalyada, isagoo carabka ku adkeeyey inay nabadgalyadu tahay waxa ugu horeeya ee laga sugayo xukumadda uu soo dhisi doono, isagoo intaa raaciyey in nabadgalyada aad looga shaqeeyey sanaddadii danbe.
"Amniga waa qodobka ugu horeeya ee dunida oo dhan u yaala...Nabadgalyo markii la hello ayaa horumar la gaadhaa. Marka wey kala horeeyaan... Sidii taam looga dhigi lahaa nabadgalyada, si horumar loo gaadho. Waad ogsoon-tahay, deegaanka Soomaalida sanaddihii la soo dhaafay...wax ballaadhan baa laga qabtay dhanka nabadgalyada," ayuu yiri Cabdi
Cabdi ayaa intii uu ahaa Hogaanka Nabadgalyada dowlad deegaanka Soomaalida wax badan ka qabtay arrimaha nabadgalyada, isagoo noqday masuulkii ugu horeeyey ee si daacad ah u wajaha arrimaha amaanka deegaanka.
Cabdi waxaa kale oo uu sheegay inay dowladdiisa wadi doonto wadahadalka ay kula jirto ururrada nabadda qaatay, si looga wada-shaqeeyo danta umadda iyo horumarka deegaanka.
"Inaanu sii xoojino wadahadallada socda. Dadkii shalay aanu xabadda isu-heysanay, maanta hal meel baanu ka soo wada-jeednaa. Ururka UWSLF baa ka kow ah oo ay xafladdii ugu danbeysay ka dhici doonto Addis Ababa. Waxaa ku xiga ururka ONLF oo isagana hadda nabaddii ama dastuurkii Itoobiya qaatay, markii laga reebo saddex ama afar nin oo qowleysato ah, calooshood u shaqeystayaal, dadka aanan rabin horumarka deegaanka Soomaalida, eenan danna ka laheyn shacabka deegaanka Soomaalida," ayuu yiri Cabdi.
wabishabeele.com |
|
