| Jaaliyaadka taageera dowladda oo la ogaysiinayo inay ka soo qeybgalaan banaanbax ka dhan ah siyaasadaha Masar ee Nile |
Washington, 29-Jul-2010 - Guud ahaan jaaliyaadka taageera dowladda Itoobiya ee ku sugan dalka Mareykanka waxaa loogu baaqayaa inay ka soo qeybgalaan banaanbax ballaadhan oo lagaga soo horjeedo siyaasadaha Masar ee biyaha Wabiga Nile, laguna taageerayo isku-dayga dowladda ee dhanka horumarka.
Banaanbaxan oo ay isku soo dubariday dowladda, oo kaashaneysa ururrada qurbajooga dalka, oo ay ugu horeyso Ethio-Americans ADHOC for Democracy, ayaa waxaa lagu hormari doonaa Aqalka Cad iyo wasaaradda Arrimaha Dibadda ee Mareykanka.
Banaanbaxayaashu waxaa looga baahanyahay inay muujiyaan taageerada ay u hayaan sida ay dowladda dhexe Itoobiya uga go'antahay ka hortaga faqriga, la dagaalanka argagixisada, dhaqangalinta siyaasadaha horumarka, iyo xaqa ay u leedahay isticmaalka biyaha Wabiga Nile, iyadoonan fasax ka qaadaneyn dowladda Masar.
Masar ayaa dhawaan bixisay hanjabaado hoose iyo kuwo caam ah oo ay ku dooneyso inay kaga hortagto dib u eegista hashiiskii biyaha Nile ee iyada iyo Ingriiska dhexmaray 1959. Hashiiskaas ayaa xaq u siinayey dalka Masar in isaga looga danbeeyo isticmaalka biyaha Wabiga Nile.
Masar ayaa looga cabsanayaa inay xasilooni daro dheeri ah ka abuurto gobolka haddaanan la raacin qorshayaasha ay iyadu soo jeedisay, islamarkaana looga danbeyn isticmaalka biyaha Nile.
Warsidaha wabishabeele.com ayaa dhawaan soo bandhigay qoraal faallo ah oo ka digaya in haddaanan arrinta Wabiga Nile si degdeg ah xal loogu helin ay iman doonto dhibaato saameyn weyn ku yeelata Ismaamulka Deegaanka Soomaalida iyo guud ahaan gobolka (halkan riix si aad u aqrisato qoraalkaas).
Biyaha Wabiga Nile ayaa boqolkiiba 85 kasoo daada buuraha dalka Itoobiya. Itoobiya ayaa waxaa ragaadiyey abaaro iyo faqri isa soo taraya, waxeyna dowladda ku qasban tahay isticmaalka biyaha Nile, si looga hortago abaaraha iyo gaajada baahsan.
Banaanbaxan oo ah mid nabaddeed, waxaa banaanbaxayaasha loogu baaqayaa inay isugu yimaadaan Lafayette Park, oo ka soo horjeeda Aqalka Cad ee looga arrimiyo Mareykanka, saacadu markey tahay 9:00 AM, maalinta Khamiista, bisha August 5, 2010.
wabishabeele.com |
|
