| Itoobiya & UWSLF oo saxiixay hashiis kama danbeys ah |
Addis Ababa, 29-Jul-2010 - Waxey dowladda dhexe Itoobiya iyo ururka UWSLF maanta barqadi qalinka ku duugeen hashiis kama danbeys ah, kaasoo soo afjaraya collaaddii dhowr iyo tobanka sano u dhaxeysay labada dhinac.
Xafladdi saxiixa hashiiskan, oo aheyd mid caalami ah, ayaa waxaa ka soo qeybgalay safiiro, suxufiiyin, qurbajoog, iyo wafuud ka timid dalalka dariska, oo ay kamid ahaayeen madax reer Puntland.
Xafladda ayaa waxaa qodbado dhaadheer, oo ka hadlaya hashiiskan taariikhiga ah, ka jeediyey madax ka socotay dowladda dhexe, masuuliyiin UWSLF ah iyo madaxweynaha dowlad deegaanka Soomaalida, Cabdi Maxamud Cumar.
Hashiiskan ayaa waxaa aad ula dhacsan shacabka deegaanka Soomaalida, dal iyo dibad, waxeyna ku hanweyn yihiin inuu isbadal wacan u horseedo noloshooda iyo aayaha mustaqbalkooda.
Deegaanka Soomaalida ayey sanado badan ka taagnaayeen collaado u dhaxeeya dowladda dhexe iyo jabhado diidan kasii mid ahaanshaha dalka Itoobiya, collaadahan ayaa sababay dib u dhac iyo rafaad badan oo la soo darsay shacabka.
Dowladda dhexe Itoobiya ayaa la filayaa inay dhankeeda la timaado furfurnaan iyo isbadal dhaxalgal ah, si shacabku u gurto midhaha hashiiska maanta, islamarkaana u noqdo hashiiskan mid micno leh oo waara.
wabishabeele.com |
|
