| Bereket oo sheegay inuu maanta dhacayo saxiixa hashiiski dowladda & UWSLF |
Addis Ababa, 29-Jul-2010 - Emaillo uu wasiirka Xafiiska Warfaafinta dowladda dhexe Itoobiya, Bereket Simon, u diray warbaahinta ayuu ku sheegay in maanta uu dhici doono saxiixa hashiiskii dhexmaray dowladda iyo ururka UWSLF.
Magaalada Addis Ababa ayaa isbuucan oo dhan waxaa ku soo qulqulayey xubnaha ururka UWSLF iyo qeybaha jaaliyaadka ee taageera nabadda, si ay goob joog uga noqdaan xafladda saxiixa hashiiskan.
Dowladda dhexe ayaa dhankeeda wada abaabul ballaadhan oo ay ku dooneyso inay xafladan noqoto mid caalami ah, oo lagu martiqaado warbaahinta, marti-sharaf, diplomacy-yiin, iyo masuuliyiin kala duwan.
Xafiiska Warfaafinta ayaa tan iyo shalay dirayey emaillo xambaarsan fariinta xafladan, waxaana warbaahinta loogu baaqay inay kasoo qeybgasho.
Dhanka kale, dowladda dhexe ayaa wadahadal kan la mid ah kula jirta garab xoogan oo katirsan ururka ONLF, waxaana la filayaa in xaflad tan oo kale ah loo qabto waqti aanan wali la shaacin.
Shacabka deegaanka Soomaalida, dal iyo dibad, ayaa aad u soo dhaweeyey dhaqdhaqaaqa nabaddeed ee ay wadaan dowladda iyo ururradan. Shacabka ayaa ka daalay collaad, cudur, gaajo iyo jahli.
wabishabeele.com |
|
