| Mudane katirsan Aqalka Mareykanka oo dalbaday in Eriteriya lagu daro liiska argagixisada |
Washington, 23-Jul-2010 - Mudanaha hogaamiya Guddi Hoosaadka Aqalka Mareykanka u qaabilsan arrimaha argagixisada, dhimista hubka iyo ka ganacsiga, Ed Royce, ayaa dalbaday in Eriteriya lagu daro liiska argagixisada.
Warqad uu u diray Xoghayaha Arrimaha Dibadda ee Mareykanka, Hillary Clinton, ayuu Ed Royce ku yiri, "Waqtigi la joojin lahaa taageerada dal ee ay hesho al-Shabab waa hadda, inta aynan qatartan xoogeysan oo aynan soo gaadhin xuduudaheena."
"Jawaabta waa inay ku jirtaa in si daacad ah loo fahmo doorka qarbudaad ee ay dowladda Eriteriya ka cayaareyso gobolka, iyadoo loo aqoonsanayo inay tahay dal taageera argagixisada," ayuu Ed Royce ku muujiyey qoraalkiisa.
Weerarraddii argagixiso ee Kampala ayaa ah kuwii ugu dhimasho badnaa ee gobolka ka dhaca tan iyo weerarraddii 1998 loo geysta safaaradaha Mareykanka ee Nairobi iyo Dar es Salaam, kuwaasoo iyana lagu xidhiidhay kooxaha mayalka adag.
Ugu yaraan 73 qof ayaa ku nafwaayey, kuwaasoo uu ku jiray qof Mareykan ah, weerarradii Kampala ee lagu qaaday goobo ay dad shacab ah ku daawanayeen ciyaaraha Koobka Aduunka.
Kooxda al-Shabaab ayaa sheegatay inay ka danbeysay weerarradii argagixiso ee Kampala, iyadoo tilmaantay inay ka aargoosaneysay ciidamada Uganda ee ku sugan caasimadda Muqdisho.
wabishabeele.com |
|
